कठरिया सन्देश

१९ फाल्गुन २०८०, शनिबार

  • gold Teach Computer
    gold Teach Computer
  • चररा गाउँमे फुटबल खेलके बहार, बिजेता पइहें इनाम ५० हजार

    चररा गाउँमे फुटबल खेलके बहार, बिजेता पइहें इनाम ५० हजार
    Spread the love

    पहलमानपुर, अगहन १६ ।। कैलाली जिल्लाके भजनि नगरपालिका वडा नं. ७ चररा गाउँ हरदम खानखानिक कार्यक्रम करके चरचामेहें रहता । अइसनिहिं इहि शुकके दिनति स्थानिय पुरैना युवा क्लवके १९ अउँ बारसिक उत्सबके माैकामे ५० हजार धनराशिके फुटबल प्रतियोगिता सुरु हाेइल हइ ।

    आयाेजक पुरैना युवा क्लवके अध्यक्ष माेतिराम कठरियाके अगवाइमे हाेइल कार्यक्रमके सबति बन्ना पहुना नागरिक उन्मुक्ति पार्टी सुदूरपश्चिम प्रदेशके सँसदिय दलके युवा नेता माननीय घनश्याम चाैधरि आउ बिसिस्ट अतिथि भजनि ७ के वडा अध्यक्ष अमरबहादुर कठरिया रहल रेहें ।

    क्लवके उपाध्यक्ष कुसल साहिके स्वागत मन्तब्य सँघे सुरु हाेइल कार्यक्रममे जनप्रतिनिधि, सँघसँस्थाके प्रतिनिधि, राजनितिग्य, बुदधिजिबि, समाजसेबि, अगुवा, भल्मन्सा आउ फेक तमाने खेलपिरेमिभरिन बहुते जेदा उपस्थिति रेहे ।

    उदघाटनमे तमान मेलिक साँस्कृतिक कार्यक्रम हाेइल उ दिन पहिला फुटबल खेल फेकुन हाेइल रेहे । उदघाटन खेलमे युवा मिलन क्लव खैलाड ओहके फ्रेन्डस युवा क्लव २ के बदला ३ गाेलति हटाइल रेहे । उ दुनु टिमके खेलमे सबति मजा खेलाडि पवेराके मुकेश सिके चुनल रेहें । उनके आयाेजक ती ईनाम दइगेल रेहे ।

    सालुक चररा गाउँमे आयाेजना हुइति रहल प्रतियोगिताके यि सालुक प्रतियोगितामे जितइया टिम ५० हजार रुपइया, मेडल आउ प्रमाणपत्र पइहें । अइसनेकरके खेलमे अक्के खेल हटके उपबिजेता हुबइया टिम ३० हजार नगद, मेडल आउ प्रमाणपत्र पइहें । एहका अलाबा खेलभर मजा आउ अनुसासनमे रहके खिलइया खेलाडिभर फेकुन इनाम पइना उदघाटन कार्यक्रमके सँचालक तथा पुरैना युवा क्लवके सचिव जयप्रकाश कठरिया बतइनें ।

    उ फुटबल प्रतियोगितामे आज सनिच्चर फेकुन तमाने टिमभरिन बिचमे खेल हाेइल आयाेजक बतइले हइ ।

    सुचना तथा संचार मन्त्रालय,
    दर्ता नं. : 071/72/770,
    पान नं.: 6026465656565656565

    ब्यवस्थापक :- अर्जुन कठरिया

    प्रकाशक :- राजेन्द्र कठरिया

    प्रधान सम्पादक :- टिआर कठरिया

    © 2024 Copyright: Dahit Group PVT.LTD