कठरिया सन्देश

१९ फाल्गुन २०८०, शनिबार

  • gold Teach Computer
    gold Teach Computer
  • चररा फुटबल: टीकापुर ओहके हटाके आयाेजक पुरैना क्लव जितल फाइनल खेल

    चररा फुटबल: टीकापुर ओहके हटाके आयाेजक पुरैना क्लव जितल फाइनल खेल
    Spread the love

    पहलमानपुर, २४ अगहन ।। कैलाली जिल्लाके भजनि नगरपालिका वडा नं. ७ चररामे स्थानिय पुरैना युवा क्लवके आयाेजनामे हाेइल फुटबल प्रतियोगितामे अतबारके फाइनल खेल हाेइल । आयाेजक क्लव आउ टिकापुरके खेलाडिभर एक अउरेक सँघ खेल जितेक तहनि बहुते जेदा प्रतिस्पर्धा करने ।

    उहि सिलसिलामे टिकापुरके खेलाडि नविन चाैधरि खेल सुरु हाेइल लगभग १५ मिनेटमे गाेल करके अपना टिम ओहके अग्रता दिबाइल रेहें । जहका बजहति चरराके खेलाडि आउ समर्थकभरिन अब खेल हटजिबा कइहके चिन्ता सुरु हुइगेल रेहे आउ उ चिन्ता लगभग फाइनल खेलके अन्तिम १ मिनेट लुक्का रहल ।

    मुल अचानक खेलके समय उरइनाती लगभग १ मिनेट बचल समयमे चरराके खेलाडि सँदिप सिंह ठकुरि टीकापुरके बिरुद्धमे गाेल घुमाइल पाछे खेल जेदे राेमान्चक बने पुगल रेहे ।

    ओहका पाछुक खेल बराबर हाेइल बजहति पेनाल्टी सुटआउटमे गइल रेहे आउ उ दउरान टिकापुर ओहके हटाके आयाेजक पुरैना युवा क्लव खेल जितल (बिजेता हाेइल) । साथे टिकापुर उ खेलभरमे अक्केठाेर खेलहारके उपबिजेता बनल ।

    खेल जितइया बिजेता टिम पुरैना युवा क्लव ओहके इनाम स्वरुप नगद ५० हजार, ट्रफि आउ प्रमाणपत्र पुरस्कार बितरण तथा समापन कार्यक्रमके सबति बन्ना पहुना भजनि नगरपालिकाके नगरप्रमुख केवल चाैधरि हस्तान्तरण करनें । आउ उपबिजेता टिम टिकापुर ओहके उहि भजनि नगरपालिकाके निमित्त प्रमुख प्रशासकिय अधिकृत सुर्य बहादुर सिंह नगद ३० हजार ट्रफि आउ प्रमाणपत्र हस्तान्तरण करनें ।

    अइस्ने करके खेलमे मजा आउ अनुशासित खेल खेलल् खेलाडिभरिन फेक पुरस्कार दइगेल रेहे । जहमें बेस्ट डिफेन्डरके पुरस्कार बिस्नु चाैधरि (पुरैना क्लव), बेस्ट किपर दिपक बाेहरा (पुरैना क्लव), बेस्ट स्काेरर सुरेश चाैधरि (७ गाेल पुरैना क्लव), बेस्ट प्लेयर हिरेन्द्र सिंह (टिकापुर) आउ मेन अफ दि म्याच गाेलकिपर दिपक बाेहरा (पुरैना क्लव) दइगेल रेहे ।

    बेष्ट प्लेयरभरिन भजनी नगरपालिका वडा नं. ७ के वडाध्यक्ष अमर बहादुर कठरिया, पुर्व लालबाेझि गा.बि.स. अध्यक्ष वीर बहादुर हमाल लगायत तमान बुद्धिजीवी, समाजसेवि, अगुवा, खेलपिरेमिभर पुरस्कार हस्तान्तरण करले रेहें ।

    आयाेजक क्लवके अध्यक्ष माेतिराम कठरियाके सभापतित्वमे हाेइल प्रतियोगिता समापन तथा पुरस्कार बितरण कार्यक्रमके सँचालन सचिव जय प्रकाश कठरिया करले रेहें । चररा गाउँमे हरसाल क्लवके बार्षिक उत्सवमे फुटबल प्रतियोगिता हुइति आइल हइ ।

    यी साल १९ अउँ बार्षिक उत्सव रेहे आउ उहिक मउकापारके आयाेजना करल फुटबल प्रतियोगितामे जिल्लाके २५ ठाेरा टिमके सहभागिता रहल रेहे । अगहन १५ गतेतिति सुरु हाेइल उ खेल आज अतबारके दिन निप्टल । प्रतियोगिता आयाेजना करेक तहनि भजनि नगरपालिका वडा नं. ७ आउ तमान दाताभरिन आर्थिक मद्दत हाेइल रेहे ।

    सुचना तथा संचार मन्त्रालय,
    दर्ता नं. : 071/72/770,
    पान नं.: 6026465656565656565

    ब्यवस्थापक :- अर्जुन कठरिया

    प्रकाशक :- राजेन्द्र कठरिया

    प्रधान सम्पादक :- टिआर कठरिया

    © 2024 Copyright: Dahit Group PVT.LTD