धनगढी २७ मंसिर/ सुदूरपश्चिम प्रदेशसभा सचिवालयले नवनिर्वाचित प्रदेशसभा सदस्यहरुका लागि नयाँ लोगो बनाउन लागेको छ । सचिवालयले ५३ जना नवनिर्वाचित प्रदेशसभा सदस्यका सुन र चाँदीको जलप लगाइएको लोगो बनाउन लागेको हो ।
लोगोका लागि आवश्यक पर्ने सुन र चाँदी राष्ट्र बैँकबाट खरिद गर्न प्रदेशसभा सचिवालयले एक जना कर्मचारीलाई काठमाडौँ पठाएको छ । प्रदेशसभा सचिवालयका सचिव देवबहादुर बोगटीले नवनिर्वाचित सांसदका लागि विगतमा जस्तै लोगो बनाउन लागिएको बताए ।
बोगटीले तत्कालीन प्रदेशसभा सदस्यहरुलाई दिइएको लोगो फिर्ता माग्ने प्रचलन नभएका कारण सचिवालयले नयाँ लोगो बनाइरहेको बताए । प्रदेशसभा सचिवालयले यसअघि पनि ५३ जनाका लागि चाँदी र सुनको जलप लगाइएको लोगो बनाएको थियो ।
