पहलमानपुर, २७ फागुन ।। सुदूरपश्चिमके मुख्यमन्त्री त्रिलोचन भट्ट घोडाघोडी ताल संरक्षणके दायित्व सबका रहल बतैले हैं । कैलाली जिल्लाके घोडाघोडीमे आज आयोजित घोडाघोडी बर्ड सेन्चुरी (चरा अभय आरण्य क्षेत्र) घोषण कार्यक्रममे ऊ घोडाघोडीके धार्मिक आउ प्राकृतिक ऐतिहासिकता बचैना करके सबकुई संरक्षण करना आवश्यक रहल बतैनें ।
मुख्यमन्त्री भट्ट घोषणा करके केल नाई हुइना कहती विश्व रामसार क्षेत्रमे सुचिकृत कैलालीके घोडाघोडी सिमसार संरक्षण करना सबका दायित्व रहल बतैनें । घोडाघोडी धार्मिक आउ प्राकृतिक पर्यटनके दृष्टिती महत्वपुर्ण क्षेत्र रहलके मारे यहका ऐतिहासिकता बचैना करके संरक्षण करना आवश्यकता रहल उनका कहाई रेहे ।
घोडाघोडी सिमसार ओहके नेपालके पहिला बर्ड सेन्चुरी घोषणाती चिरै संरक्षण आउ पर्यटन विकासमे जोड पुग्ना विश्वास ऊ ब्यक्त करने । घोडाघोडी नगरपालिका मातहतके बृहत घोडाघोडी ताल तथा पर्यटन विकास बोर्डती घोडाघोडी ताल सहितके घोडाघोडी सिमसार क्षेत्र ओहके बर्ड सेन्चुरी घोषणा करल है ।
प्रदेश सरकारके कानुनके भित्तर रैहके बर्ड सेन्चुरी घोषणा करल आयोजकके कहाई है । विश्व रामसार क्षेत्रमे सूचिकृत घोडाघोडी सिमसारमे ३६० मेलके चिरैं मिल्तीयाँ ।
