कैलाली, १९ फागुन ।। कोरोनाले सेलाएको प्रर्यटन क्षेत्र विस्तारै चलायमान हुन थालेको छ । यसैक्रममा सुदूरपश्चिमका मुख्य प्रर्यटकिय क्षेत्र मध्ये एक शुक्लाफाटा राष्ट्रिय निकुन्जमा पनि पर्यटन आवागमन बढेको छ ।
३ सय ५ वर्ग किलोमिटर क्षेत्रमा रहेको निकुञ्जमा ५४ वर्गकिलोमिटरमा घाँसेमैदान रहेको रहेको छ । अहिले शुक्लाफाँटा पर्यटन महोत्सव पनि चलिरहेकाले यस क्षेत्रको प्रचार प्रसारमा पनि जोड दिइएको छ ।
कोरोना संक्रमणअघि शुक्लाफाँटामा १२ हजार बढी पर्यटक निकुञ्जमा घुमेका भएपनि त्यसपछि कोरोना संक्रमणका कारण पर्यटकको संख्या घटेको छ । निकुञ्ज कार्यालयका अनुसार आर्थिक वर्ष ०७५/०७६ मा १२ हजार १३८ पर्यटकले अवलोकन गरेका छन ।
कोरोना संक्रमण सुरु भएको वर्ष ०७६/०७७ मा १ हजार ७७५ र गत आर्थिक वर्षमा २ हजार ९३५ जनाले मात्रै निकुञ्ज प्रवेश गरेका छन ।
कोरोना संक्रमण सुरु भएयता विदेशी पर्यटकको संख्या पनि निकै कम भएको छ । गत आर्थिक वर्षमा ३ जना मात्रै विदेशी पर्यटक आएका थिए ।
अघिल्लो वर्ष १ सय जना विदेशीले अवलोकन गरेका थिए । यस वर्ष संक्रमण कम भएसँगै विदेशी पर्यटक पनि आउन थालेका छन ।
