टिआर कठरिया, १ चैत ।। कैलाली जिल्लाके कैलारी गाउँपालिका वडा नं. ८ मे रहल एक गाउँ है लौसा । जहाँ कठरिया थारु भरिन सबती जेदा बासोबास है । अपने अगले भाषा, संस्कृति आउ पहिचान रहल कठरिया समुदायके अगुवाईमे कुछ बरषती ‘होरी उत्सव’ कठरिया गाउँमे पलिकपाला मनैना क्रम चल्ती रहल है ।
फागुन महिनक २८ गते शनिच्चरके दिन लौसामे होईल कठरिया भरिन जिल्ला स्तरिय बैठकती अईना ‘तिसरा बृहत कठरिया साँस्कृतिक होरी महोत्सव २०७८’ लौसा गाउँमे यिही चैत महिनाक १० आउ ११ गते आयोजना करना सल्लाह होईल पाछे ऊ दिनती लौसा गाउँवासी बेढम तयारीमे लागल हैं ।
यि समयमे हम्मर गाउँमे कुई नाघा, अँगिया सिंनामे लागल है, कुई झगिया, कुल्ही बनबैनामे जुटल है आयोजक जनकल्याण युवा क्लवके सल्लाहकार लौटन कठरिया बतैनें । ऊ कहतियाँ हम्रे भल्मन्सा घर साँहिजुन ढोल सपरना, कलाकार आउ ठाढी होरी नच्ना, आधुनिक जमाना सुहैना होरीक गीत बनैनामे लागल होई ।
पहिला होरी उत्सव कोंटातुल्सिपुरमे होईल, दुसरा चर्रामे अब तिसरा लौसा गाउँमे करना प्रयास करत होई यहका तहनि हम्मर समुदाय लगायत अन्य समुदायके फेक साथ, सहयोगके अस्रा करत होई कार्यक्रमके प्रवर्द्धक समेत रहल कैलारी गाउँपालिका वडा नं. ८ के वडाध्यक्ष दुखिराम कठरिया बतैनें । ऊ कह्तियाँ सबका साथ सहयोग रिहित कार्यक्रम मजस पुरा करबा ।
लौसा गाउँवासीभर कार्यक्रम ओहके भब्य आउ सभ्य तरिका ती पुरा करेक तहनि मञ्च निर्माण, आर्थिक ब्यवस्थापन, प्रचारप्रसार, अथिती सत्कार लगायत तमान उपसमिती गठन करले हैं ।
