मसुरिया, १ चैत । कैलालीको गौरीगंगा नगरपालिका–९ मसुरिया बजारमा निर्माण गरिएको अस्थायी प्रहरी पोष्ट हस्तान्तरण गरिएको छ । वडा कार्यालयको सहयोगमा मसुरिया बजार व्यवस्थापन समितिले अस्थायी प्रहरी पोष्ट निर्माण गरेको थियो ।
मुख्य बजारमा स्थापना गरिएको प्रहरी पोष्टको कैलालीका प्रहरी नायब उपरीक्षक वेदप्रकाश जोशीले उद्घाटन गरेका थिए । वडा अध्यक्ष हरि प्रसाद तिवारी र मसुरिया बजार व्यवस्थापन समितिका अध्यक्ष हरिप्रसाद जोशीले उपरीक्षक जोशीलाई ताला चावीसहित अस्थायी प्रहरी पोष्ट हस्तान्तरण गरेका छन् ।
कैलालीमा लागुपदार्थको कारोबार प्रयोगले सुरक्षा चुनौतीपूर्ण बन्दै गएको र घर–परिवारबाट आफ्ना किशोरावस्था र युवा छोराछोरीमाथि निगरानी नगर्दासम्म समाजमा शान्ति सुरक्षा कायम गर्न चुनौती रहेको प्रहरी नायब उपरीक्षक जोशीले बताएका छन् ।
मसुरिया बजारमा विगत केहि समय यता लुटपाट चोरी र लागुपदार्थको कारोबार जस्ता घटना घटिरहेको भन्दै स्थानीयले बजार क्षेत्रमा शान्ति सुरक्षा कायम गर्न प्रहरीको उपस्थिति हुने गरी पोष्ट माग गरेका थिए ।
बजारमा सुरक्षा चुनौती बढेपछि स्थानीय बासिन्दाको माग अनुसार अस्थायी प्रहरी पोष्ट निर्माणका लागि सहयोग गरेको वडा अध्यक्ष तिवारीले बताए । प्रहरीको उपस्थितिले बजार क्षेत्रमा शान्ति, सुरक्षा कायम हुनमा सहयोग पुग्ने बजार व्यवस्थापन समितिका अध्यक्ष जोशीको भनाइ थियो । उनले पोष्टमा चौबिसै घण्टा प्रहरी राख्न माग गरेका छन् ।
