कैलाली, १७ असोज ।। आश्विन शुक्ल अष्टमीका दिनमा मनाइने महाअष्टमी पर्व आज बडादशैंका रूपमा दुर्गा भवानीको विशेष पूजाआराधना गरी भव्यरूपमा मनाउँछन् ।
बडादशैंको आठौं दिन आज महाकाली, महालक्ष्मी र महासरस्वतीको विशेष पूजाआराधना गरिन्छ। महाअष्टमीको दिन दुर्गा भवानीलाई शक्तिशाली बनाउने दिन भएकाले यसको विशेष महत्त्व रहेको विभिन्न वैदिक सनातन परम्पराका ग्रन्थमा उल्लेख छ।
आजको दिन शास्त्रसम्मत रूपमा दशैंघर, कोत लगायत विभिन्न शक्तिपीठमा पशु बलि दिई दुर्गा भवानीको विशेष पूजा गरिन्छ। दुर्गा सप्तशती, श्रीमद्देवीभागवत र देवी स्तोत्र पाठ गरिन्छ। तर थारु समुदायमा भने आफ्नो देवतालाई ढिक्री पुज्ने चलन छ ।
आजको दिनलाई थारु समुदायमा ढिक्रहुवा भन्छन् । पुजा गर्ने पुजेरुले दिनभरी ब्रत बस्छन् र साझा विभिन्न आकारको ढिक्री देवतालाई चढाएर पुजा गर्ने चलन छ । थारु समुदायमा भने पशु बलि दिईन्दैन ।
