कैलाली, ८ असार ।। सुदूरपश्चिमको पुरानो नगरपालिका टीकापुर नगरपालिमा एक वर्षमा ४० लाख रुपैयाँ खाना खर्च भएको खुलासा भएको छ ।
महालेखा परीक्षकको कार्यालयबाट हालै सार्वजनिक लेखा परीक्षण प्रतिवेदनका अनुसार सो नगरपालिकाले आर्थिक वर्ष २०७७।०७८ मा ४० लाख ८९ हजार ३ सय ३२ रुपैयाँ खानामा खर्च गरेको छ ।
खाना खर्चबाहेक नगरपालिकाले सो आर्थिक वर्षमा जनप्रतिनिधिलाई सुविधावापत ८४ लाख ७२ हजार रुपैयाँ बाँडेको पनि प्रतिवेदनमा उल्लेख छ । प्रतिवेदनमा जनप्रतिनिधिले कुन शीर्षकमा कति रकम बुझे भन्ने विवरण उपलब्ध नगराएको पनि उल्लेख छ ।
सभा सञ्चालनकै लागि मात्र एक वर्षमा टीकापुर नगरपालिकाले ११ लाख ५१ लाख ९ सय २६ रुपैयाँ खर्च गरेको छ ।
आर्थिक वर्ष २०७७।०७८ मा टीकापुर नगरपालिकामा ६ करोड ६ लाख ७१ हजार बेरुजु देखिएको छ, जसमध्ये १ करोड १० लाख २ हजार असुलउपर गर्नुपर्ने बेरुजु रहेको छ ।
सो आर्थिक वर्षमा टीकापुरको कूल बजेट १ अर्ब ५ करोड रुपैयाँ रहेको थियो । नगरपालिकाको बेरुजु ६ प्रतिशत देखिएको छ । यो सुदूरपश्चिममैं सबैभन्दा धेरै बेरुजु हो ।
