घोडाघोडी नगरपालिकामा हतियार सहित प्रवेश गरेका विरुद्ध मुद्दा दर्ता, कडा कारबाही गर्न राजनैतिक दलहरूको माग 

कैलाली, २३ असार ।। कैलालीको घोडाघोडी नगरपालिकामा धारिलो हतियार सहित प्रवेश गरेका तीन जना विरुद्ध मुद्दा दर्ता गरिएको छ । नगरपालिकाको कार्यालयमा घुसेर धम्की दिने तीन युवक विरुद्ध मुद्दा दर्ता गरिएको हो ।

प्रहरीका अनुसार घरेलु हतियार सहित नगरपालिकाको कार्यालयमा प्रवेश गरेका सोही ठाउँका वडा नम्बर २ साँडेपानीका ३६ वर्षीय वीरबहादुर बोहरा, २८ वर्षीय भूपेन्द्र रावल र २६ वर्षीय रामप्रसाद चौलागाई हिजै समातिएका थिए ।

पक्राउ परेका तीनै जनाविरुद्ध सार्वजनिक हितविरुद्ध अन्तरगतको अभद्र व्यवहार शीर्षकमा मुद्दा दर्ता गरिएको इलाका प्रहरी कार्यालय सुखडका प्रमुख प्रहरी नायव उपरीक्षक लक्ष्मण शाहीले दिएको छ । उनीहरू रिफ्रेस सेन्टर निमार्णको भुक्तानी माग गर्दै नगरपालिकाको कार्यालय भित्र हतियार सहित प्रवेश गरेका थिए ।

कडा कारबाही गर्न राजनैतिक दलहरूको माग 

कैलालीको घोडाघोडी नगरपालिकामा हतियार सहित प्रवेश गरेकाहरूलाई कडा कारबाही गर्न सात राजनैतिक दलले माग गरेका छन् । बिहीबार संयुक्त विज्ञप्ति जारी गर्दै उनीहरूले घटनामा संलग्न रहेकाहरूलाई कारबाही गरेर कर्मचारीहरूलाई काम गर्ने वातावरण सृजना गर्न पनि माग गरेका छन् ।

एमाले, काँग्रेस, माओवादी, नेकपा एस, राप्रपा, नागरिक उन्मुक्ति पार्टी र राष्ट्रिय जनमोर्चाले संयुक्त रूपमा विज्ञप्ति जारी गर्दै कारबाहीको माग गरेका हुन् । कर्मचारीलाई हतोत्साहित नहुन पनि विज्ञप्तिमा आग्रह गरिएको छ ।

के भएको थियो घट्ना ?

घोडाघोडी नगरपालिकाको बैठक चलिरहेको थियो । अचानक बैठक चलिरहेको समयमा ३ जना सोहि नगरपालिका वडा नं. २ का युवाहरु धारिलो हतियार सहित नगरपालिका कार्यालय प्रबेश गरे ।

कार्यालयमा नियमित काममा खटिएका कर्मचारीहरु ति युवाहरुको हातमा धारिलो हतियार देखेपछि कर्मचारीहरुको भागा भाग भएको थियो । इलाका प्रहरी कार्यालय सुखडका प्रमुख प्रहरी नायव उपरीक्षक लक्ष्मण शाहीको भनाई अनुसार साँडेपानीमा निर्माण भइरहेको रिफ्रेस सेन्टरको विषयमा विवाद भएपछि उनिहरु नगरपालिकाको कार्यालय भित्र प्रवेश गरेका थिए ।

‘साँडेपानीमा निर्माण भइरहेको रिफ्रेस सेन्टर साँडेपानी कै स्थानीय एक समूह त्यही बन्नु पर्ने र अर्को समुह बन्नु हुँदैन भन्ने गरेको र सोसी विवाद चर्किएपछि एक समुह नगरपालिका नै उडाई दिने र नगरपालिकाका कर्मचारीहरूलाई काटी दिन्छु भन्दै नगरपालिकाको कार्यालय प्रवेश गरेका हुन्,’ उनले भने ।

मासु काट्ने हतियार र छुरा सहित नगरपालिका प्रवेश पश्चात मोटरसाईकलमा भाग्दै गर्दा उनिहरुलाई ईलाका प्रहरी कार्यालयको टोलीले पक्राउ गरि प्रक्रिया अघि बढाएको हो ।