मसुरिया, ९ फागुन ।। कैलालीकाे गौरीगंगा ११ स्पोर्ट्स क्लबको प्रथम साधारण सभा सम्पन्न भएको छ । मंगलबार गौरीगंगा नगरपालिका ८ बढैपुरमा साधारण सभा सम्पन्न भएको हो ।
साधारण सभालाई सम्बोधन गर्दै नगर प्रमुख देवीदत्त कडेलले नगरको विकास गर्न एक ठाउँबाट मात्र नहुने बताउदै नगरको विकासमा युवा पुस्ताको खेलकुदमा सहभागीताका योजना बनाइ सहकार्य, लगानी गर्न तत्पर बताएका छन् ।
कडेलले सबै जना एकजुट भए मात्र आवश्यकताको पहिचान गरेर साझा योजनामा हातेमालो गरी सभ्य स्वास्थ्य समाजको निर्माणमा खेलकुदले पहिचान बनाउन सक्ने बताए । क्लबले प्रतियोगिताको आयोजना गरेर सुदूरपश्चिम प्रदेश र राष्ट्रिय स्तरमा खेलकुदको क्षेत्रमा पहिचान बनाएको भन्दै प्रशंसा समेत गरेका थिए ।
नगर उप-प्रमुख भोज बहादुर बमले गौरीगंगा नगरपालिका खेलकुदमय होस भनेर हरेक खेलकुदलाई सँगसँगै लगेर अगाडि बढाउने प्रयत्नमा रहेको बताउँदै बजेट विनियोजन गरेको समेत जानकारी दिएका छन् ।
साधारण सभामा क्लबलाई महत्त्वपूर्ण सहयोग तथा योगदान गरेका गौरीगंगा ८–का अशोक जोशी र विमल चौधरीलाई सम्मान गरिएको थियो ।
सभामा वडा १ का अध्यक्ष डबल बहादुर दियाकोटी, मसुरिया एकेडेमीका अध्यक्ष ध्वज बहादुर खाती,मसुरिया ब्याडमिन्टन क्लबका अध्यक्ष चक्र बहादुर कलेल,डिल्लीराम आचार्य, चन्द्र बम र टेक राज ओझा लगायतले शुभकामना मन्तव्य राखेका थिए ।
यसै गरी सभामा आ.व.२०७४/०७५ र २०७५/०७६ को १८ लाख ३२ हजार २५० रुपियाँ आय र २४ लाख २३ हजार २९० खर्च प्रस्तुत गरिएको थियो । क्लबका अध्यक्ष दिनेश कलेलको सभापतित्वमा साधारण सभा सम्पन्न भएको थियो ।
